پیارے اسلامی بھائیو آج ہمارے معاشرے میں گناہوں کی بھرمار ہے۔ جس طرف نگاہ دوڑائیں، لوگ مختلف گناہوں میں مبتلا نظر آتے ہیں۔ کوئی اللہ تعالیٰ کی ناشکری کرتا دکھائی دیتا ہے، تو کوئی ماں باپ کی نافرمانی کرتا ہے۔ کوئی ربِّ کریم کی رحمت سے مایوس ہو کر گناہوں میں ڈوبا ہوا ہے۔ اس کے باوجود اللہ تعالیٰ اپنے بندوں پر بے شمار نعمتیں نازل فرماتا ہے، جنہیں شمار بھی نہیں کیا جا سکتا۔ مگر جب کوئی نعمت چھن جاتی ہے تو اکثر لوگ فوراً مایوسی کا شکار ہو جاتے ہیں اور شیطان کے بہکاوے میں آکر گناہوں کی دلدل میں پھنس جاتے ہیں۔
جب گناہوں کی زیادتی ہو جائے تو انسان سوچنے لگتا ہے کہ اب اللہ تعالیٰ معاف نہیں فرمائے گا۔ حالانکہ یہ سوچ شیطان کا دھوکہ ہے۔ اللہ تعالیٰ قرآن مجید میں واضح ارشاد فرماتا ہے:
قرآن مجید کا فرمان:

قُلْ یٰعِبَادِیَ الَّذِیْنَ اَسْرَفُوْا عَلٰۤى اَنْفُسِهِمْ لَا تَقْنَطُوْا مِنْ رَّحْمَةِ اللّٰهِؕ-اِنَّ اللّٰهَ یَغْفِرُ الذُّنُوْبَ جَمِیْعًاؕ-اِنَّهٗ هُوَ الْغَفُوْرُ الرَّحِیْمُ

ترجمۂ کنزُ الایمان: تم فرماؤ: اے میرے وہ بندو جنہوں نے اپنی جانوں پر زیادتی کی! اللہ کی رحمت سے نااُمید نہ ہو، بیشک اللہ سب گناہ بخش دیتا ہے، بیشک وہی بخشنے والا مہربان ہے۔

اس آیت کے شانِ نزول کے بارے میں متعدد روایات ہیں ،ان میں سے ایک یہ ہے حضرت عبداللہ بن عباس رضی اللہ عنہما فرماتے ہیں : مکہ کے چند مشرکوں نے قتل و زنا جیسے بڑے گناہ کیے تھے۔ جب وہ نبی کریم ﷺ کی خدمت میں حاضر ہوئے تو عرض کی: “جو کچھ آپ فرماتے ہیں وہ تو بہت اچھا ہے، لیکن کیا ہمارے اتنے بڑے گناہوں کی بھی معافی ممکن ہے؟” اس پر یہ آیاتِ مبارکہ نازل ہوئیں

وَالَّذِیْنَ لَا یَدْعُوْنَ مَعَ اللّٰهِ اِلٰهًا اٰخَرَ وَ لَا یَقْتُلُوْنَ النَّفْسَ الَّتِیْ حَرَّم اللّٰهُ اِلَّا بِالْحَقِّ وَ لَا یَزْنُوْنَ”

ترجمہ: اور وہ جو اللہ کے ساتھ کسی اور معبود کو نہیں پکارتے، اور ناحق کسی جان کو قتل نہیں کرتے جسے اللہ نے حرام کیا، اور بدکاری نہیں کرتے۔