Bu mohammadraza
اللہ و رسول سے خیانت
از : مولانا عمران رضا مدنی بنارسی
صحابیِ نبی حضرت عبداللہ بن عباس رضی اللہ عنہ نے فرمایا:
“فرائض چھوڑ دینا اللہ تعالیٰ سے خیانت کرنا ہے، اور سنت کو ترک کرنا رسول اللہ صلی اللہ علیہ وسلم سے خیانت کرنا ہے۔”
[“اے ایمان والو!”، ص: 341، از: مفتی قاسم عطاری]
انسان اور امانتِ اعضاء:
یونہی انسان کو اللہ تعالیٰ نے جو اعضاء عطا فرمائے ہیں، یہ اس کے پاس خدا کی امانت ہیں۔ انہیں ناجائز کاموں میں استعمال کر کے امانت میں خیانت نہ کی جائے۔
حضرت عبداللہ بن عمر رضی اللہ عنہما فرماتے ہیں:
“اللہ عزوجل نے انسان کی شرم گاہ کو پیدا کیا تو فرمایا: ‘یہ ایک امانت ہے جو میں نے تیرے سپرد کی ہے، اسے حق کے علاوہ قابو میں رکھ۔'”
کسی کا قول ہے:
انسان کا معاملہ اپنے رب تعالیٰ کے ساتھ یہ ہے کہ وہ مامورات پر عمل کرے اور منہیات سے اجتناب کرے۔ کیونکہ انسان کا ہر عضو اللہ عزوجل کی امانت ہے۔
زبان میں امانت یہ ہے کہ انسان اسے جھوٹ، غیبت، چغلی، بدعت اور بدکلامی میں استعمال نہ کرے۔
آنکھ میں امانت یہ ہے کہ اسے حرام اشیاء دیکھنے میں استعمال نہ کرے۔
کانوں میں امانت یہ ہے کہ انہیں حرام سننے کے لیے استعمال نہ کرے۔
اسی طرح دیگر اعضاء بھی اللہ کی امانت ہیں۔
[“اے ایمان والو!”، ص: 346]
محترم قارئین!
ذرا غور کریں، کہیں ہم اللہ و رسول کے خائن تو نہیں بن رہے؟
فرائض و سنن کی ادائیگی میں کوتاہی تو نہیں برت رہے؟
ہمارے عمل میں غفلت تو نہیں؟
ہم سستی اور کاہلی کے شکار تو نہیں ہو گئے؟
ہر نصیحت کو دوسروں کے لیے سمجھنے اور محفوظ کرنے کے بجائے ایک مرتبہ ہم اپنی گریبان میں جھانک کر اپنے نفس کا جائزہ لیں!
اگر فرائض و سنن میں کچھ کوتاہی واقع ہو رہی ہے تو فوراً سے پیشتر اسے دور کریں۔ یقین جانیں! زندگی، موت کا کوئی بھروسہ نہیں، کب پیغامِ اَجل لیے موت کا فرشتہ آ جائے، ہم میں سے کسی کو اس کا علم نہیں۔
بے شک! سمجھدار ہے وہ شخص جو موت سے پہلے موت کی تیاری کر لے۔
اللہ پاک ہمیں ایمان پر استقامت عطا فرمائے، آمین!
admin
