Bu mohammadraza
حالتِ علالت میں “ICU وارڈ” میں تحریری کام
آج 27 اپریل، بروز اتوار، صبح “پڑاؤ” (بنارس) “لطیف ہاسپٹل” میں مبلغِ اسلام، علامہ عبد المبین نعمانی مصباحی دامت برکاتہم القدسیہ کی عیادت کے لیے حاضری ہوئی۔
حضرت نعمانی صاحب پچھلے دس دنوں سے ہاسپٹل میں ایڈمٹ ہیں۔ بحمدہ تعالیٰ طبیعت میں پہلے سے افاقہ ہے اور ان شاء اللہ جلد گھر بھی آجائیں گے۔
نعمانی صاحب عالمِ باعمل، صوفیِ باصفا، مبلغِ اسلام، رہنمائے قوم و ملت، محسنِ ملت، ماہرِ قرطاس و قلم ہونے کے ساتھ ساتھ زبردست پیرِ طریقت بھی ہیں۔
آپ کئی بہترین اوصاف کے حامل بزرگ ہیں۔ دین پر سختی سے عمل کرنا آپ کی پاکیزہ خصلت میں شامل ہے۔ ICU میں ایڈمٹ ہونے کے باوجود بھی نماز کا اہتمام کرنا اور وقت پر نماز ادا کرنا آپ کا خوبصورت وصف ہے۔
آج نعمانی صاحب کے پاس حاضری ہوئی تو ایک مسودہ دکھانے لگے اور فرمایا کہ: “چند دن پہلے ICU میں تھا تو سوچا، بیٹھے بیٹھے کچھ لکھ ہی لوں!”
پھر چند صفحات دکھائے، جن پر مضامین درج تھے۔ دو عنوانات یہ تھے:
- کیا آپ مصنف بننا چاہتے ہیں؟
- یہ راتوں کے سپاہی
جن میں کئی نصیحت آموز باتیں موجود تھیں۔ ان شاء اللہ چند دنوں بعد آپ یہ مضامین ملاحظہ کرسکیں گے۔
علامہ عبد المبین نعمانی صاحب کی زندگی کا ایک طویل عرصہ تصنیف و تالیف میں گزرا ہے۔
آپ نے خود کتابیں لکھنے سے زیادہ دوسرے کتاب لکھنے والوں پر توجہ دی۔ کتابوں کی تصحیح کرنا، نظرِ ثانی کرنا، ان کی غلطیوں کو دور کر کے بہترین انداز میں منظرِ عام پر لانا آپ نے اپنی ترجیحات میں شامل رکھا۔
نئے مصنفین اور کالم نگاروں کی اصلاح کرنا، عمدہ مشورے دینا اور تحریر کو مزید خوبصورت بنانے کے لیے انمول نکات بتانا آپ نے اپنا مشن بنایا۔
کئی بڑی بڑی کتابیں ایسی ہیں جن کی تصحیح کا کام آپ نے انجام دیا۔ بلکہ بیماری کے دنوں میں بھی کتابوں کی تصحیح اور نظرِ ثانی کا عمل جاری رکھتے ہیں۔ سفر میں بھی کتابوں کی اصلاح اور تصحیح کا کام کرتے رہتے ہیں۔
علماے کرام اپنی کتابوں پر آپ کے تأثرات اور تقریظ کو شامل کرنا اپنی خوش نصیبی سمجھتے ہیں۔ اور کیوں نہ ہو کہ آپ “ماہرِ قرطاس و قلم” جو ٹھہرے۔
ایسے موقع پر ان اسلافِ کرام کی یاد تازہ ہو گئی جنھوں نے آزمائش کے دنوں میں بھی تحریری خدمات جاری رکھیں، جیسے:
❍ حنفی فقیہ امام شمس الدین سرخسی رحمۃ اللہ علیہ کا کنویں کے اندر سے المبسوط لکھوانا۔
❍ علامہ فضلِ حق خیرآبادی رحمۃ اللہ علیہ کا ایامِ قید میں الثورۃ الہندیہ لکھنا۔
❍ علامہ عنایت احمد کاکوروی رحمہ اللہ کا قید کے ایام میں علم الصیغہ جیسی عظیم کتاب لکھنا۔
نعمانی صاحب قبلہ کے اس واقعے میں ہم سب کے لیے درس ہے کہ ہمیں چاہیے ہم بھی اپنی صحت کے ایام سے بھرپور استفادہ کرتے ہوئے کچھ نہ کچھ تحریری کام کرتے رہیں۔
مضامین لکھیں، آرٹیکلز تحریر کریں، کالم نگار بنیں، ماہ ناموں، سہ ماہی مجلوں، اخبارات اور سالناموں میں اپنے مضامین شامل کروائیں۔
سوشل میڈیا کا صحیح استعمال کرتے ہوئے مختلف ویب سائٹس، واٹس ایپ، ٹیلیگرام، ٹوئٹر وغیرہ پر اپنے مضامین اپلوڈ کریں تاکہ زیادہ سے زیادہ لوگوں تک دین کی صحیح تعلیمات پہنچ سکیں!
عمران رضا عطاری مدنی (بنارس)
admin
